काठमाडौँ । अन्तर्राष्ट्रिय महिला च्याम्पियनशिप फुटबल प्रतियोगिता नेपालले विजयी शुरुआत गरेको छ । सोमबार दशरथ रंगशालामा भएको पहिलो खेलमा नेपालले कीर्गिस्तानलाई १–० ले हरायो ।
विमला चौधरीले खेलको ११ मिनेटमै गरेको हेड गोल नै निर्णायक बन्यो । खेल पूर्णतः नेपालको नियन्त्रणमा रहे पनि गोलका लागि भने संघर्षरत रहेको थियो ।
विमलाको यो दोस्रो व्यक्तिगत गोल हो । उनले यसअघि सन् २०२१ मा फिलिपिन्सविरुद्ध गोल गरेकी थिइन् ।
दोस्रो हाफमा सावित्रा भण्डारी साम्बा मैदानमा प्रवेश गरे पनि उनी गोल गर्नबाट चुकिन् ।
कीर्गिस्तानसँग नेपालले अहिलेसम्म एक खेल खेलेको थियो । सन् २०१९ कीर्गिस्तानमै भएको नादेज्दा कपमा नेपाल ८–२ को फराकिलो अन्तरले विजयी भएको थियो ।
अब नेपालले प्रतियोगिताको आफ्नो दोस्रो खेलमा लेबनानको सामना गर्नेछ ।
यसअघि उद्घाटन खेलमा म्यानमार विजयी भएको थियो । म्यानमारले लेबनानलाई ३–१ ले पराजित गरेको हो ।
पहिलो हाफ गोलरहित बराबरीमा सकिएको खेलको ५६औं मिनेटमा म्यानमारले शुरुआती अग्रता लियो। थिन थइनगितुनले गोलले पेनाल्टी बक्सबाट प्रहार गरेको बलले सिधै जाली चुमेको थियो ।
६०औँ मिनेटमा लेबनान पनि खेलमा फर्कियो। मध्यभागबाट लयला इस्कान्डरले एक्लै बल बढाउँदै गोल गरिन्।
७२औँ मिनेटमा म्यानमारले पुनः अग्रता लियो। स्वेय यी तुनले हेडरमार्फत बललाई जाली चुमाइन् । त्यसको तीन मिनेटपछि म्याट नोए बिनाले अर्को गोल गर्दै टिमलाई जिताइन् ।
